文章日期 : 2017年9月15日

哈囉喂到 又嚟瞓棺材

【明報專訊】入屋見到殭屍同血,又到玩鬼屋嘅季節喇!今年海洋公園哈囉喂有鬼屋以中世紀做背景。玩家聽完巫師嘅指示,入咗棺材,感受完生葬之後,就會跌入下層嘅迷宮,跟住就要獨自逃生,好彩嘅話仲可以撞番朋友仔嘅,咁當然都會撞到啲怨氣好重嘅骷髏骨啦,唔好彩就可能畀人捉咗去奉獻。

另一間鬼屋「恐懼鬥室」,就重現咗電影入面一啲情節,Emily收到風,下個月先上映,一啲第8集嘅情節都會喺鬼屋出現喎。

海洋公園行政總裁李繩宗噚日話,暑假幾個風暴,令公園有兩日半開唔到,但入場人次就同舊年差唔多。7、8月內地訪港旅客上升咗,佢相信9月同10月會有多啲人入場。佢仲話今年萬聖節活動係歷年最大規模,用多咗10%至20%錢,達8位數字,希望今年人流比舊年嘅100萬好。

鬼屋「活埋凶間」、「恐懼鬥室」等多個「哈囉喂全日祭2017」景點,喺10月5日至31日期間,16個指定日子開放,有興趣咪入去試吓膽量囉。