文章日期 : 2017年9月8日

再培訓局學員 免費幫街坊飛髮

【明報專訊】僱員再培訓局噚日舉辦美髮服務日,由12個「髮型助理基礎證書」課程嘅畢業學員,幫近百個綜援或低收入家庭嘅街坊免費剪髮。曾經上過16個鐘剪髮課程嘅僱員再培訓局主席梁永祥,再次落場大展身手幫一名街坊剪髮。Emily見佢手勢純熟,臨尾仲好細心用掃為街坊輕輕掃走身上嘅頭髮。

同場仲有新上任嘅僱員再培訓局行政總監吳國強,曾任副勞工處長嘅吳國強話香港唔少行業缺乏人手,希望未來可以釋放勞動力市場,例如幫少數族裔、較年長人士等增值後再就業。

推免費課程 5000人報名

再培訓局今年7月至9月推出「全民愛增值」活動,畀合資格市民免費報讀一項半日制或晚間制嘅非就業掛鈎課程。截至本月6日有約5000人報名,當中約1400人係首次參與該局課程,反應唔錯。梁永祥話今次報讀新技能提升計劃課程嘅人次佔咗62%,物業管理及保安、健康護理及環境服務行業課程較受歡迎。佢話希望鼓勵多啲市民持續進修,有興趣市民可於本月30日前報名。