文章日期 : 2017年8月31日

瑪麗置鋼琴任人彈 曾浩輝露兩手

【明報專訊】地盤工人喺商場彈琴流露出鐵漢柔情,瑪麗醫院最近都放咗個琴任人彈,啲醫生即刻流露出另一番韻味。話說好耐無見嘅衛生防護中心前總監曾浩輝(曾仔),前日去咗瑪麗又彈又唱,同瑪麗行政總監陸志聰合唱《陪着你走》,唱到「跟我一起飛去」,兩個醫生仲「拍翼齊飛」𠻹。

「誰說,時間片刻變陳舊……」無見一排,鋼琴高手曾仔無乜點變,笑起上嚟仍有個酒窩。佢前日「出山」除咗彈琴,又同陸志聰合唱《陪着你走》,聽落佢哋都幾合拍,有晒台風,曾仔一面唱一面以手「拍翼」,陸志聰見佢喺度「飛」,亦跟住一齊拍翼,相當鬼馬。

瑪麗醫院前日開始推出「藝術在瑪麗」,喺醫院L1大堂永久設置鋼琴,每日中午12點至下晝5點畀公眾彈奏,頭兩星期有午間音樂天地,有表演睇,醫院希望用音樂為人打氣。