文章日期 : 2017年8月25日

5明星柴犬揹機拍片 帶旅客漫步舊城中環

【明報專訊】傻頭傻腦嘅5隻柴犬,行樓梯街、入文武廟,喺中上環走嚟走去,就係為咗同大家介紹中上環嘅好去處。5隻柴犬叫「WE5」,係中上環老街坊,已經喺嗰頭住咗超過7年。旅發局近排搵咗佢哋拍宣傳片,宣傳「舊城中環」遊,希望借助呢班狗狗KOL嘅人氣,吸引多啲人留意,事關「WE5」唔止係區內風頭躉,喺Instagram仲有1.1萬個followers(追隨者)。

旅發局特別喺佢哋身上安裝咗攝影器材,當狗狗開心擺尾,相機就會自動感應到尾巴郁動,影低開心一刻,佢哋喺兩日拍攝期間影咗大約400張相。

市民可以喺旅發局網站、YouTube、Instagram等社交平台睇到WE5影嘅相同片,旅發局遲下仲會喺「舊城中環」多個地方,例如PMQ元創方、文武廟等設立狗狗QR Code,方便旅客瀏覽短片,了解「舊城中環」資料。