文章日期 : 2017年7月28日

撒瑪利亞會擬出輔導App

【明報專訊】用手機上網已經成為生活一部分,專做情緒輔導工作嘅香港撒瑪利亞防止自殺會,都計劃喺半年內推出應用程式(App),接觸有自殺傾向人士。

其實,該會一直有網上防止自殺服務嘅「真心話室」,舊年頭半年接觸咗656名有自殺問題或情緒困擾嘅網絡使用者。機構總幹事曾展國同Emily講,佢哋見到愈來愈少年輕人利用電話求助,反而「真心話室」嘅求助數字就增加,所以半年內會進一步延長服務時間,由現時每日晚上8點至凌晨1點,提早至每日朝早7點就開始提供服務,同時會推出App,希望接觸多啲年輕人。

咁招募義工時會否要求上網技巧?曾展國話中心正展開新一期義工招募,將於下月18日截止,笑言將會改善訓練方向,加強網絡溝通技巧訓練,都會招募多啲年輕義工,期望今次可以招募到至少50至100人。