文章日期 : 2017年7月12日

考局出書 重溫那些年試題
唐創時離任在即 揭「好人好事」

【明報專訊】今日文憑試放榜,考評局秘書長唐創時按慣例喺噚日舉行記者會公布考生成績,原來已經係佢最後一次主持文憑試記者會喇。佢仲向記者大派附有親筆簽名嘅首屆會考題目輯錄書仔,又叫記者試吓做啲題目。

唐創時做咗6年秘書長,今年9月離任,佢話冇諗過過得咁開心,同局方上下都有種友誼同伙伴關係。佢又話,每次考評局準備文憑試,都係懷住考生人生中最重要嘅考試心情,仲話職員背後做咗好多嘢都冇人知。

考生嘔落試卷 職員助掃描

佢舉咗個例,話某年有個學生考考吓唔舒服,嘔喺試卷上,局方職員為咗確保考生寫咗出嚟嘅嘢閱卷員睇得到,就將充滿嘔吐物嘅試卷逐張分番開,小心翼翼咁掃描落電腦度,等考生心血唔好白費。唐創時笑說仲有好多「好人好事」,真係想出本書呀。

講開出書,考評局今年40周年,出咗本該局主辦首屆會考題目輯錄《1978香港中學會考試題選集》,入面有唔少𠵱家冇嘅科目同題目,例如中英翻譯、金工等等(部分見圖),嗰個年代嘅會考生不妨買番本,回味一下青葱歲月。唐創時話呢本書限量發行,今年書展有售,賣40蚊,仲叫大家買本嚟試做吓喎。