文章日期 : 2017年6月29日

有機西瓜節 推橙肉「新蘭」

【明報專訊】漁護署同農業組織合作舉辦嘅第10屆「本地有機西瓜節」周五起(6月30日至7月2日)一連三日喺大埔農墟舉行,售賣本地有機產品,包括最新喺台灣引進嘅橙肉小西瓜「新蘭」。

周五至周日大埔農墟舉行

漁護署農業主任(園藝)陳益民話,舊年發現市民對非紅肉西瓜接受程度提高,所以今年推出橙肉西瓜「新蘭」,佢嘅果皮都係綠色,果肉係橙黃色,味道清甜,而且果形細,方便食用。佢話今年推廣嘅品種除咗「新蘭」,仲有往年引進嘅「玉蘭」、「黛安娜」同「超甜黑美人168」,預計共推出6000個本地西瓜,同場亦會售賣迷你冬瓜同苦瓜等本地時令蔬果。

參展嘅青協有機農莊負責人黃天生就同Emily講,佢哋種咗近300個有機西瓜,計劃賣55蚊一磅,一個大概重兩三磅,預計今次可帶嚟過萬蚊銷售額。佢又話,西瓜「怕水」,吸收太多水分會令西瓜爆開或根部壞死,但今年雨水較多,估計部分農莊收成受影響,導致今年本地西瓜供應量減少。

西瓜節於6月30日中午12點至夜晚8時、7月1日至2日朝早9點至晏晝5點,喺大埔太和路救護站側嘅大埔農墟舉行,漁護署亦邀請咗中環、美孚地區嘅有機農墟參與西瓜節,等大家唔使走去大埔都可以買到新鮮嘅本地有機產品。