文章日期 : 2017年6月16日

插畫師製繪本 改善與自閉兒溝通

【明報專訊】嚟緊星期日就係父親節,爸爸收到咩最開心?對插畫師阿高嚟講,能夠走入6歲歲自閉症囝囝嘅世界,就係最快樂。阿高幾年嚟一直試用唔同方法同囝囝溝通,後來發現「老本行」最有效。

阿高嘅仔仔晴曦歲幾證實有自閉症,唔識得表達自己,好容易情緒激動,人際社交同一般小朋友唔同,阿高都無辦法同晴曦溝通。後來阿高嘗試用返老本行,就係用畫教科書插畫嘅方式,自製繪本教晴曦社交技巧,結果好有成效。原來晴曦好難集中精神聆聽,但視覺就比較靈敏。加上阿高有20年畫插畫經驗,製作一本繪本只係小兒科,約1小時就完成,𠵱家已製作咗3至4本。

解釋後囝囝不再怕地鐵入站

阿高慢慢學識由晴曦嘅角度睇世界,例如晴曦每次喺地鐵入站時都會大叫同跑開,阿高細心觀察同了解之後,知道晴曦係驚地鐵輾過佢嘅影子先會逃走,阿高解釋一輪後,晴曦就唔再驚。

阿高諗起當初既要學習點同晴曦溝通,又要照顧患癌太太,同時兼顧工作,真係好辛苦。好彩太太最終康復,晴曦接受訓練後入咗主流幼稚園,識到一班朋友仔,下學期仲入主流小學。

阿高話,能夠打入囝囝嘅世界比收到禮物更加開心同滿足,只要囝囝喺自閉嘅世界注意到爸爸嘅存在,主動同佢講嘢,已經令佢最快樂。