文章日期 : 2017年6月8日

長洲氣象站播打風舊聲帶

【明報專訊】為咗紀念香港採用數字颱風信號100周年,天文台將會喺長洲氣象站做導賞團,介紹香港颱風信號嘅歷史;天文台聯同香港電台合作徵集颱風歷史資料,包括收集咗以往電台播出嘅打風聲帶,仲由天文台長岑智明提供嘅舊式收音機播放。

陳年文件介紹風災點滴

Emily同一眾行家噚日隨天文台參觀裝修好嘅長洲氣象站,除咗聲音檔案,館內仲有展板介紹站內歷史,同埋長洲經歷過嘅風災。從首次展出嘅文件見到,1971年時颱風露絲吹襲長洲,吹斷咗氣象站信號杆,長洲鄉事委員會特地致函天文台要求維修,可見當年信號站對長洲居民同漁民有幾咁重要。

此外,站內展出1960年時颱風瑪麗吹襲長洲時嘅照片,以及長洲各界就瑪麗風災籌款嘅收據,希望公眾多了解颱風威脅,提高防災意識。氣象站暫時未開放畀公眾參觀,但天文台會喺今年秋冬季同長春社搞導賞活動,介紹氣象站同長洲其他歷史景點,詳情稍後先公布。