文章日期 : 2017年5月17日

港島電動車主喜訊 港燈增3快速充電站

【明報專訊】為咗響應環保,近年電動車成為唔少車主嘅選擇,但充電配套問題一直備受關注。港燈噚日有好消息宣布,就係喺港島新增3個多制式快速充電站,分別位於香港大學綜合大樓、太古城中心同埋柴灣興華(一)邨停車場,3個新充電站已於5月12號啟用。

6標準電站升呢 充電更快

港燈同時將6個標準充電站「升呢」,變成中速或快速充電站,當中天后停車場同中環天星碼頭停車場,𠵱家可以支援電動車中速充電;而太古城中心、數碼港、山頂廣場同筲箕灣愛東邨充電站更加可以快速充電。

港大太古城柴灣3站啟用

港燈話新增3個快速充電站之後,港燈充電站網絡已經可以全面覆蓋中區、西區、灣仔區、東區及南區,電動車車主喺港島市區內,於平日路面正常下,只需15分鐘之內就可以到達最近一個嘅港燈充電站,又指充電器支援包括歐洲、美國、日本同韓國嘅電動車車款。

港燈又話,今年內會同時將「港燈低碳App」升呢,將所有充電站嘅實時使用狀態資料上載到App,方便車主搵到最合適嘅充電站。