文章日期 : 2017年5月4日

學生計數機要考局打印 皆因當年有人出貓

【明報專訊】相信唔少人都會記得,公開試試場所用嘅計數機,一定要印有「H.K.E.A. APPROVED」或者「H.K.E.A.A. APPROVED」標籤,呢項安排原來係1991年開始,究竟當年發生咩事?1978至1996年任職香港考試局嘅前副秘書長京力士(Rex King)最近返香港,大爆原來當年有考生用計數機出貓。

當年發現做手腳 可儲百字母

京力士話,當年有考生唔知點搵到方法,只要按特定次序按下20個鍵,就可以改動計數機主機板,令計數機可以顯示英文字母,最多儲存100個字母,成為出貓工具。考試局(後稱考評局)知道之後,即時禁止用有關計數機,但涉及嘅型號有成大約200個,監考員好難拎住咁長嘅名單逐個檢查,唯有諗諗計。

一個職員為萬部機印標籤

考試局最後要求所有學校,派職員將考生用嘅計數機送去考試局寫字樓,一個職員用咗幾個月時間,利用一部原本用嚟將卡通人物印喺筆盒等平面上嘅印刷機,為每部計數機印上標籤,當時間房堆積過萬部計數機,足足有兩三米高。

從此以後,計數機嘅生產商都會喺准用型號嘅計數機上,印上考評局准用標籤以示識別。