文章日期 : 2017年5月2日

聽日太平清醮 海味店派平安「鮑」

【明報專訊】太平清醮聽日舉行,長洲太平清醮值理會噚日就喺長洲向唔同食肆派傳單,呼籲食肆遵守齋戒期,長洲鄉事委員會主席翁志明話,如果有商舖唔遵守傳統都「無佢符」。有值理會就聯同海味店,喺飄色巡遊期間派發200隻「平安『鮑』」嘅鮑魚模型(圖),市民其後可以憑模型換取真鮑魚。

長洲大新街街坊會主席孔憲禮話,飄色巡遊時,會有一架飄色車不時派發鮑魚模型,寓意如意吉祥,金銀滿屋,市民其後可以去大新街值理會用模型換取真鮑魚。孔憲禮話佢哋無違反齋戒期,今次係喺完晒成個太平清醮先派真鮑魚。

值理會籲食肆守齋戒

翁志明就話,到時如果有商舖唔守齋戒,都「無佢符」、「費事同佢嘥氣」,因為無法律禁止啲人食肉,希望大家遵守傳統。