文章日期 : 2017年4月18日

青年「爆橋」拍片推廣惜食 城大生作品獲選「最強團隊」

【明報專訊】每日廚餘重量等於240架巴士

香港每日產生超過3000噸廚餘,重量約相等於240架雙層巴士,數量都幾嚇人。為咗推廣「惜食」運動,減少浪費,香港青年協會賽馬會Media 21媒體空間 (「M21」) ,同香港迪士尼及「膳心連」合作,舉辦「識講惜食爆橋營」48小時惜食Social Media市場策劃大賽,透過激發青年人嘅創意,一齊「爆橋」,運用唔同嘅社交媒體,推廣及宣傳「惜食」文化。

超過40名參加者,於48小時內聽完多個專業人士嘅分享後,就即時策劃推廣活動,並將佢哋嘅計劃喺社交媒體分享,希望將「惜食」信息以最有效嘅方式,喺新媒體上「爆」發開去。藝人王宗堯、游學修同《惜食香港》運動宣傳代表「大嘥鬼」,亦有份參與部分參賽隊伍拍攝,同一班後生仔一齊實踐佢哋設計嘅宣傳計劃。

王宗堯游學修有份演出

經過一輪比併,香港城市大學市場營銷學系嘅隊伍,以「識惜識食 真.惜食」為主題,獲選「#識講惜食爆橋營最強團隊」。短片講男主角游學修本來同個樣靚身材正嘅女神拍拖,可惜女神唔「惜食」,成日嗌成枱嘢食,相機「食」完後自己又唔食,極為浪費,令到惜食嘅男主角好苦惱,最後決定同女神分手,選擇一個惜食、愛環保有內在美嘅伴侶。