文章日期 : 2017年4月13日

大英博物館借6木乃伊展覽
透視骨骼飾物 無創掃描開眼界

【明報專訊】康文署預留1.9億元舉辦回歸20周年慶祝活動,到底有咩睇?康文署長李美嫦話,嚟緊將會有5個同世界知名博物館合作舉辦嘅重點展覽。其中6月至10月喺科學館舉辦嘅「永生傳說—透視古埃及文明」展覽,將展示大約200件由大英博物館借出嘅展品,包括6具木乃伊,其中一具仲會連埋棺木一齊運嚟香港。

200展品 1木乃伊連棺木運港

科學館總館長薛雯話,到時會利用無創電腦斷層掃描(CT Scan)技術,畀大家睇到木乃伊嘅骨骼結構同身上飾物,入場者仲可以控制掃描位置,互動啲睇到木乃伊嘅唔同部分。呢6具木乃伊有唔同背景,有小朋友、歌手同祭師,所以除咗窺探木乃伊內裏乾坤,仲會見到相關展品,例如當時小朋友玩嘅玩具同樂器等,可謂大飽眼福。

絲路展逾半文物屬一級 破紀錄

至於暫名為「絲綢之路」嘅展覽就會喺年尾開始,歷史博物館總館長黃秀蘭話,今次唔係第一次搞絲路展覽,特別在邀請咗哈薩克斯坦同吉爾吉斯借出「長安—天山廊道」嘅文物;加上慶回歸咁高興,國家文物局都開綠燈,借出嘅160件文物中,將會有至少一半屬於國家一級文物,打破以往最多兩成嘅規限,陣容比以往喺內地以外地區嘅展覽更有分量。

其餘3個展覽,包括「萬壽載德—清宮帝后誕辰慶典」、「八代帝居—故宮養心殿文物展」同「羅浮宮的創想:從皇宮到博物館的八百年」,分別同故宮博物院同羅浮宮博物館合作(見表)。

免費開放常設展覽 入場升27%

另外,康文署舊年8月開始免費開放5個博物館嘅常設展覽,李美嫦話,舊年8月到今年2月嘅平均入場人次比前一年度同期升27%,而喺歷史博物館舉辦嘅「香港玩具傳奇」展覽,上個月5號單日就有10,376人次參觀,成為2016/17年度嘅單日冠軍。至於整體參觀人次最多嘅,就係科學館舊年7月至11月舉辦嘅「古怪動物園」展覽,有28.8萬人次入場,唔知玩具展有無機會再創新高呢?