文章日期 : 2017年4月3日

退休警成男大妗 識破渾水摸魚假賓客

【明報專訊】喺中國傳統婚嫁儀式中帶動氣氛、事事安排妥當嘅大妗,唔係女性先做到嘅。60歲退休男警鄒國基5年前退下火線後,不甘無所事事,報讀咗耆康老人福利會「傲齡動力——友待長者就業計劃」專業大妗姐課程,打破傳統性別框架,成為行內少數嘅男大妗。

新娘僱主:體格勝一籌

鄒國基早前接受政府新聞處訪問,話自小好鍾意同尊敬大妗,欣賞佢哋既照顧新人,又識帶動氣氛。作為行業稀客嘅鄒國基入行後遇上唔少困難,例如唔方便幫新娘整理裙褂同入新娘房,只好靠同大妗姐拍住上互補不足。警察同大妗兩個職業雖風馬牛不相及,但佢成功將過往經驗運用喺新工作上,有次仲憑住警員觸覺,識破渾水摸魚嘅假賓客。

聘請鄒國基做大妗嘅新娘梁曉彤覺得,男大妗喺工作上同大妗姐無分別,但體格勝一籌,可以幫手搬重嘢。耆康會主席麥建華話,退休長者再就業係大勢所趨,除咗長者可貢獻社會,僱主解決到招聘問題,亦可推動社會經濟持續發展。正所謂活到老學到老,鄒國基仲修讀司儀同說話技巧課程,夜晚兼任婚宴司儀𠻹。