文章日期 : 2017年3月16日

理大共享工作空間 創業團隊免費用1年

【明報專訊】理工大學噚日成立創新協作空間「InnoHub」,呢個2000平方呎嘅共享工作空間,同時可為40個創業團隊提供免費流動式辦公座位同合作平台,理大同時宣布每年撥款140萬港元,支援最多42個團隊建立創科項目,令學生或畢業生可更容易建立創科事業。

理大企業發展院助理院長(創業培育及顧問服務)朱志賢話,目前已有28個初創團隊進駐InnoHub,每個進駐團隊可免費使用呢個空間1年,會繼續招收更多團隊。

理大亦宣布推出「學生創業概念驗證基金計劃」,正修讀相關學科或喺指定相關創業比賽勝出嘅學生團隊都可受惠,獲選團隊可得高達3萬元嘅基金資助,亦可使用InnoHub,得到培訓及商業指導。

馬來西亞人Rico Chan為理大設計學院博士畢業生,讀書期間研發出「觸感聽覺互動系統」,讓失明人士以觸覺同聽覺「睇」畫作,早前更開展社企「Beyond Vision Projects」,同美國三藩市亞洲藝術博物館合作設計一系列觸感聽覺版畫;佢話有幸得到InnoHub幫助,先有一個工作同交流嘅平台,令佢有信心繼續發展創科項目。