文章日期 : 2017年3月10日

花卉展主打玫瑰 今維園開幕

【明報專訊】3月乍暖還寒之際,一年一度嘅「香港花卉展覽」今日起至19號一連10日喺維園舉行,有超過240個嚟自17個國家嘅機構參展。今年花展主題為「愛‧賞花」,以玫瑰做主題花,場內會展出超過35萬棵花卉,包括大約4萬棵玫瑰,令維園變成五彩繽紛嘅花花世界。

既然今年花展主打玫瑰花,場內又點少得玫瑰花嘅展品?其中一個大型嘅玫瑰花展品「瑰麗‧情真」,就以四大朵玫瑰花造型雕塑為中心,由唔同角度展現玫瑰浪漫、高貴同美麗嘅面貌。另一個大型展品、由花卉鑲嵌成花壇嘅「遊園樂」,造型係唔同嘅機動遊戲,包括仿照摩天輪設計,以喚起市民喺遊樂場嘅快樂回憶。

生日蛋糕擺設賀回歸20年

鬱金香深受港人喜愛,今年場內就有1.4萬棵由唔同顏色鬱金香鋪設而成嘅「花海」,預料會成為市民「打卡」嘅好地方。由於今年同時係香港特區成立20周年,場內亦設有一個名為「生日蛋糕」嘅花藝擺設,以慶祝呢個重要時刻。

除咗一系列花卉展品,每晚7點半同8點半場內都會舉行燈光匯演,花展期間亦設有適合一家大細參與嘅工作坊同遊戲等。

花展開放時間為每日朝9晚9,部分日子會延長開放至夜晚10點,入場全費14元;長者及小童收7元。詳情可以瀏覽康文署網頁﹕www.lcsd.gov.hk/tc/hkfs/2017/index.html