文章日期 : 2017年3月8日

匯豐推語音認證 傷風變聲都唔怕

【明報專訊】匯豐銀行3月27號會喺香港推出語音認證服務,平時啲密碼要有大細楷、數字、符號等等,日後講句嘢就可以代替用開嘅password?小琴覺得好神奇之餘,亦都好擔心安全問題!唔少記者朋友噚日都諗咗各式各樣嘅情境題詢問匯豐。

噚日有匯豐職員即場示範登記,登記時只需要讀3次「我有件事想搵你幫吓手」,電話就會自動記錄你嘅聲紋,呢句密碼係指定語句,想自訂自己嘅心水暗號係唔得架!匯豐香港區零售銀行及財富管理客戶服務中心主管彭淑貞(圖右)一再強調,人嘅聲線同指紋一樣都係獨一無二,所以,就算你幾叻扮聲都好,唔好諗住可以hack入人地個戶口!

不過,有時咁唔好彩喉嚨痛或者傷風鼻塞,把聲都會變變哋,彭淑貞話完全唔使擔心,因為你每一次用語音登入嘅時候,系統都會有學習功能,記錄埋你聲音嘅微妙變化,就算18歲用到80歲,系統都會逐次update你嘅聲音,唔使隔幾年又要登記一次。

[小琴密語]