文章日期 : 2017年3月7日

浸大發明「唇語密碼」 助交易驗證

【明報專訊】指紋解鎖或驗證周圍都用緊,但大家有冇諗過個嘴都可以當密碼咁用?浸大有教授就發明利用「唇語」當密碼用,仲結合咗唇部動作同密碼內容雙重驗證,冇咁易畀人破解。

「唇語密碼」嘅原理係利用唇語向記錄儀器「講」出密碼10次,儀器就會記錄唇嘅紋理、唇部動作同埋密碼內容,密碼就咁設置;至於解碼或驗證,只要向儀器「講」出設置密碼時嘅唇語就搞掂。呢個密碼使用方法仲適合講唔同方言同埋語障者,因為密碼由自己設置,唇語內容講乜都得,而且設置過程唔使發出聲音,唔受背景雜音或距離影響之外,語障者亦都可使用。

你可能問,咁第二個人睇到或者估到你向住儀器講嘅唇語,再照辦煮碗講出嚟,咁咪畀人解到?原來其他人嘅唇紋、肌肉動作點都會唔同,好難模仿,所以係解唔到㗎。

研究呢種方法嘅浸大計算機科學系教授張曉明話,呢項技術已經喺2015年攞到美國專利,預計可以用喺財務交易驗證,好似流動通訊電子交易、自動提款機交易、信用卡密碼驗證、企業或私人地方嘅入口保安系統等。