文章日期 : 2017年2月14日

員工收利市要上繳? 酒樓業話間間唔同

【明報專訊】新年𢭃利市好開心,但有部分酒樓員工𢭃咗利市係無得落自己袋,要上繳公司。近日網上流傳一張相,話有間酒樓發通告要求員工將初十及打後收到嘅利市,交畀公司做「員工福利金」,違反規則嘅員工會被警告,重犯者要即時解僱。

呢張通告引來網民熱議,有人認為酒樓有問題,「過年本身係開開心心,搞到啲員工無心機」,亦有人覺得利市係客人畀員工,酒樓要求上繳屬過分。據了解,有關酒樓喺秀茂坪,Emily噚日致電酒樓,接聽員工話負責人唔喺度,未有回應事件。

Emily就呢件事問過幾個業界人士,其中「大榮華酒樓」董事總經理梁文韜話,客人派利市係對員工服務嘅肯定,「邊個(員工)招呼得好,就邊個攞利市,無理由叫人『嘔番』出嚟」,但強調各間酒樓有其文化,不能一概而論。

香港餐務管理協會會長楊位醒本身係東海飲食集團嘅高級總監,佢就話東海旗下酒樓有要求員工將收到嘅利市錢歸公,「初七、初十之前嘅利市則由員工自己袋」。佢又話呢個做法係多年行規,「為公平起見,所有婚宴、新年嘅利市,員工一齊分享番」,例如酒樓為員工舉辦聚餐等。