文章日期 : 2017年2月10日

奇華新旗艦店 玩「舊香港」情懷

【明報專訊】近年香港流行返去冰室食嘢,奇華都追隨呢個「復古嘅潮流」,喺喜帖街歷史建築嘅新舖開咗間冰室,公司話希望打造懷舊特色,預計今年5至6月就會營業。

奇華呢間復古嘅新餅店噚日正式開張,入面除咗映襯喜帖街嘅婚嫁禮盒,仲有舊香港嘅元素,包括兩個奇華喺旺角上海街老舖嘅微雕模型,模型入面有個得6毫米大嘅月餅模型,上面仲巧奪天工咁印住「奇華」兩個字!小琴噚日去拜訪時,年近70歲嘅公司董事總經理黃錫祥一邊介紹奇華歷史,一邊話試營業時有老街坊登門,睇住照片追憶童年,嗰種回憶真係有錢都買唔到。

不過,近年香港遊客少咗,小琴好奇會唔會影響生意,黃生就話唔指望呢間舖會賺大錢,而係盡所能為大家帶來舊香港回憶,又不忘讚吓自己公司吸引唔少旅客,例如機場禁區新舖有五成客都喺港人,且外國人亦都鍾意,話ifc間舖最多幫襯嘅竟然係韓國人,仲有唔少韓國遊客揸住本旅遊書來奇華搵熊貓曲奇𠻹!

email: piano@mingpao.com

[小琴密語]