文章日期 : 2017年2月9日

免與內地校混淆 嶺大logo加「香港」兩字

【明報專訊】大家睇唔睇到嶺南大學嘅logo有乜分別?之唔係多咗「香港 Hong Kong」囉。嶺大校長鄭國漢話,去外地開會嗰陣,啲人成日都唔知究竟嶺南大學喺邊,有人甚至以為喺內地,所以決定加返「香港」,以正視聽。

用於通訊書函 不改校名

嶺大噚日搞春茗,校長鄭國漢好開心咁同Emily講,話佢哋換咗新logo,多咗「香港」兩隻字,等人知道嶺南大學係位處香港,亦都等啲人唔好將嶺大與內地中山嗰間中山大學嶺南(大學)學院混為一談。佢話,8間政府資助大學入面,只得嶺南冇「香港」兩隻字,其他全部都有「香港」喺前面,啲人一睇就知喺香港。

新logo會用於大學通訊、書函及活動中,但就唔使正式改官方校名。鄭國漢話,改校名比較麻煩,要修改埋《大學條例》,加上歷史因由,校名唔係好適合改,都係只改logo快捷方便啲。新logo噚日先第一次喺公開場合出現,但Emily就發現嶺大網頁logo未改喎,校方就話內部指引仲寫緊,會逐步全面使用㗎啦。