文章日期 : 2017年2月2日

澳洲精子運港 港產導盲犬七小福報喜

【明報專訊】本港導盲犬界有好消息!導盲犬Eve喺香港生咗7隻BB,𠵱家由寄養家庭照顧緊,遲啲會同大家見面。呢七胞胎分別係4男3女拉布拉多犬,其中3隻係金棕色、4隻係純黑色。

香港導盲犬協會早前喺facebook話,媽媽Eve喺1月18號下晝開始作動,到晚上8點左右生咗大哥,一直生到翌日凌晨1點半。當前面4個哥哥湧住出世之後,就輪到3個千金喇。原來幼犬食嘢時,條尾會好似充咗電咁不斷左右搖動,如果狗BB食唔飽,條尾仔就會唔多郁,所以照顧團隊要密切留意住狗BB嘅情况。

導盲犬要繁殖下一代唔容易,原來為導盲犬做人工受孕,過去只會喺居住地做,而且成功率一向偏低。今次「港產」導盲犬BB順利出世,有賴當年領展斥資購買Eve等共8隻導盲犬,今次並透過冷凍精子技術,「跨境」從澳洲運送精子來港,替Eve做人工受孕,開枝散葉。領展自2014/15年度起透過「愛‧匯聚計劃」,持續捐助香港導盲犬協會。