文章日期 : 2017年2月1日

改編PPAP 青山護師跳唱籲打流感針

【明報專訊】早排日本搞笑藝人Piko太郎嘅洗腦神曲PPAP引起熱潮,青山醫院兩個護師都玩埋一份,戴黑超、著制服,將歌詞改為「I have a vaccine, I got injected. Uh! Vaccine injected」,鬼馬宣傳打流感針。

短片短短幾日已經吸咗20萬點擊率,網民有讚有彈。雖然有唔少負評,但佢哋嘅上司就好like。

高永文讚有心有創意

食物及衛生局長高永文讚佢兩個有心有創意,鼓勵佢哋繼續發揮小宇宙;醫管局行政總裁梁栢賢仲喺facebook開心share。

男女主角喺醫管局最新一期刊物《協力》曝光,原來佢哋係青山醫院精神科護理部資深護師袁志偉同社康服務部資深護師連綺茵。

袁志偉話,打流感針係一件值得做嘅事,所以大膽又唱又跳呼籲大家打針,最初見網民負評有唔開心,見同事支持先放下心頭大石。