文章日期 : 2017年1月24日

積金局App睇唔到戶口有幾多錢

【明報專訊】強積金管理局上年12月推出「個人帳戶電子查詢」平台(ePA),等有強積金帳戶嘅打工仔查詢個人帳戶數目、受託人名稱同電話,不過就睇唔到戶口有幾多錢,市民要打番畀個別受託人查詢先得。

積金局機構事務總監及執行董事鄭恩賜同Emily講,擁有強積金戶口嘅市民,可以先喺網上申請電子帳戶,帶埋香港身分證,去積金局辦事處辦理核實身分手續,完成後可以得到用戶編號同密碼,隨時上網睇番強積金個人帳戶數目、受託人名稱同電話。

除咗上網睇,積金局仲研發咗App,市民可以透過App登記帳戶。鄭恩賜話,ePA平台推出超過一個月,已有1200名計劃成員登記使用,當中近四成已完成手續。

今年《施政報告》提出取消強積金對冲,佢話,強積金對冲削弱退休保障功能,笑言以往就算做咗任何好措施減低行政費,「市民一話對冲,(我哋)就招架唔住」,指「原罪」解決了,負面印象亦會大減。