文章日期 : 2017年1月19日

一餐團年飯 熱量可達10碗飯 一碟乳豬全體 3200卡路里

【明報專訊】新年就到,又會食團年飯。有機構近日用網上問卷訪問咗1039人,發現有48%人預計今年食兩餐團年飯,更有24%人估自己食足3餐;當中最受歡迎團年飯菜式,首3位分別係脆皮燒雞、乳豬全體同埋清蒸龍躉斑。不過,原來呢3樣餸每碟卡路里由1680至3200不等(見表),難怪84%受訪者都預料自己新春期間會重多幾磅。

健康生活網站「healthyD 」公布「港人團年飯消費及飲食習慣調查」,除咗講菜式,仲有食材。82%嘅人認為團年飯必定食雞,76%話要有魚,得40%人話燒肉係必食之選。

團年飯大魚大肉,營養師黃榮俊參考一般酒樓菜單粗略計算,成年人每餐團年飯攝取約2268卡路里,相等於10碗白飯,差唔多係成年男人正常每餐攝取量3倍,而女人更加係4倍!如果以一個70公斤體重成人士計算,要跑成3個鐘先消耗到,唔勤力做運動又食足兩餐,新年期間分分鐘重兩磅以上。