文章日期 : 2017年1月18日

沈祖堯的浪漫 勉學生勿向現實低頭

【明報專訊】中文大學校長沈祖堯早前接受馬會刊物《駿步人生》嘅訪問,大談「浪漫」之事,不過唔係講愛情,而係就理想「浪漫」一下,佢鼓勵大學生畢業後唔一定要即刻搵工,可以去吓外國做服務又或者創業等,仲話唔同意「一代不如一代」嘅講法,而係「一代不同一代」,𠵱家嘅年輕人雖然機會多,但係競爭大。

沈祖堯分享自己後生時都「被迫浪漫過一輪」,就係初時做醫生時得唔到上司讚賞,毅然辭職,走去加拿大讀博士。佢話當時冰天雪地,喺困難之中更加可以鍛煉自己,寄語大學生唔好咁快向現實同生活低頭,好好把握理想,「幾年後焦頭爛額,那時回來再打工儲錢、再嘗試吧」。

沈校長再次提及唔再同中大續約做校長嘅事,任期最長只會去到2018年,之後就會重返醫學院專注癌症研究。

佢話6年任期內,最開心係可以落實興建大學教學醫院,希望教學醫院日後可以成為公私營醫療系統之間嘅橋樑,等中產家庭都可以享有高質素服務。