文章日期 : 2016年12月30日

礦山挑戰賽籌款 助保育歷史建築

【明報專訊】馬鞍山蘊含高純度磁鐵礦,高峰期曾養活3000多個礦工家庭。70年前便為礦工家庭提供服務嘅基督教信義會,於明年2月首辦香港礦山挑戰賽,以籌款保育山中嘅歷史建築物。

需模仿村民孭柴上山

自從採礦業衰落,馬鞍山多座建築物就空置咗,信義會為活化保育,首辦礦山挑戰賽。比賽分企業賽、公開賽及親子賽,參賽者除鬥快跑完全程外,亦有唔同任務,好似要模仿當年村民孭柴上山等。基督教香港信義會助理總幹事林兆秀話,以信義會恩光堂為例,該建築群於1952年建成,去年4月被評為三級歷史建築,信義會已翻新其中嘅禮拜堂、信義學校及教師宿舍,斥資450萬元。但幼稚園同救濟品儲存倉仍未翻新,要做結構鞏固及防水工程,預計需要多450萬,林兆秀坦言籌款數字「有幾廿萬已經唔錯,因為係第一屆」。

信義會正申請文物保護資金,亦就部分建築嘅結構安全問題與政府溝通。發展局發言人話,知道信義會有意為恩光堂申請維修資助,發展局文物保育專員辦事處已向其提供相關資料,如申請成功,信義會最高可獲資助200萬元。