文章日期 : 2016年12月29日

80歲信興酒樓今結業 攝影活動留光影

【明報專訊】熬得過「3年8個月」,避不過歲月洗刷,喺深水埗有80年歷史嘅信興酒樓,見證香港高低起跌,今日光榮結業。酒樓每個角落都有唔同年代嘅歷史痕迹,信興老闆羅氏三代人近日都由海外趕返嚟,今日喺酒樓齊集做最後一日生意,聽日仲安排咗活動,畀一眾茶客好好道別。

聽日(30日)朝早11點至夜晚8點,信興舉行「【信興酒樓.光影再匯】活動」,會有攝影師在場幫參觀嘅市民推介拍攝角度,等大家可以影低老牌酒樓韻味,「太子爺」就會分時段連開3場「話當年」同大家傾偈。信興酒樓話,將會向每個入場人士收24元,收益全數用嚟購買深水埗「明哥」嘅「北河同行」飯票,惠及基層街坊;又話如果人太多,將會以「潮水式」入場,希望大家見諒。

到聽晚6點15分,酒樓外嘅霓虹招牌會最後一次亮燈,到夜晚8點就正式熄燈,等有心人把握機會拍低信興最後光影。紅底白字餐牌、膠袋上得7位數字嘅電話號碼,信興一事一物都承載香港嘅過去;酒樓話,有30幾件物品會送去歷史博物館,用隸書寫成嘅霓虹招牌就送畀M+博物館,其餘嘅就交畀理大作教學用途。