文章日期 : 2016年12月22日

聖誕立體畫 屋邨添氣氛

【明報專訊】後日就係平安夜,Emily發現最近超過10個公屋出現咗一批聖誕立體畫,款式不一,例如元朗水邊圍邨、葵涌石蔭邨、沙田隆亨邨嘅立體畫叫「聖誕盒子」,約4米乘7米,畫嘅四周全部係大小不一嘅禮物盒,聖誕老人就從地下「爬上嚟」。Emily又喺藍田安田邨、馬鞍山利安邨和沙田新田圍邨搵到另一幅立體畫「飄雪小鎮」,以聖誕老人、聖誕小鹿同飄雪做主題;葵涌葵芳邨、麗瑤邨、藍田平田邨、元朗天耀邨就有立體畫「夢幻聖誕」,融合聖誕小鎮同城市兩個景象;葵涌石籬(一)邨同大埔大元邨就有立體畫「奇幻仙境」,小朋友企埋去有種置身童話故事入面嘅感覺。

唔止立體畫,深水埗麗閣邨仲有環保聖誕裝飾,邨內嘅聖誕樹原來用咗1600個飲品膠樽整成,上面有聖誕燈飾同花,房署話希望慶祝佳節之餘,仲可以宣揚環保信息。