文章日期 : 2016年12月20日

20粒焗10個鐘 大近視波哥教冲杞子水

【明報專訊】立法會保險界議員陳健波(波哥)噚日喺facebook上載短片,透露自己20歲出頭就有800幾度近視,但𠵱家60幾歲對眼都無乜大問題,相信係過去十幾年每日都有冲杞子水飲嘅「功勞」。波哥教埋大家點樣揀靚杞子,仲話用杞子煲湯功效未必咁大。佢教大家冲水時,要將約20粒杞子放入保溫瓶加熱水,焗10個鐘先飲用就有最大功效。

兩邊見白色 就係靚杞子

波哥喺短片就引用咗港大醫學院早年嘅報告,話杞子除咗可以保護視網膜嘅視覺神經,以預防青光眼,仲可以防止大腦細胞凋亡,預防腦退化症;仲建議市民每日攝取20至40粒杞子,但食薄血丸嘅病人就要先請教醫生。波哥話,飲杞子水時記住連渣都食埋,而揀杞子時,如果杞子兩邊係白色,就應該係無染色嘅好杞子;大家最好搵有信譽嘅商戶,或者去大學中藥部購買,就比較有保證喇。