文章日期 : 2016年12月16日

機動遊戲減價25% 歐陸嘉年華開鑼 近半遊戲未有牌

【明報專訊】今年「友邦歐陸嘉年華」再度回歸,今日起一連59日喺中環海濱舉行。呢個嘉年華已經連續第三年喺香港搞,過去兩年開幕時都有部分機動遊戲未獲政府發牌,遊客入到去可望而不可玩,呢個情况今年都有可能重現,因為截至噚晚7點,33個機動遊戲中,只有17個獲發牌咋。

「友邦歐陸嘉年華」主辦單位期望今年有120萬人次進場,佢哋話,舊年收到玩家反映機動遊戲價格偏貴,所以今年下調價格25%,每個機動遊戲定價30元至60元,攤位遊戲20元。嘉年華今年棄用實體代幣,改用電子卡。

噚日大會安排咗傳媒預覽,但Emily見到現場仍然有好多機動遊戲未開,所有機動遊戲嘅確實價格都未知。大會公關噚日話暫時只有17個遊戲可以玩,目標係今日開幕時有30個機動遊戲畀公眾玩。

Emily問過機電署,截至噚晚7點,嘉年華有30個機動遊戲設計已獲批,機電署亦批出咗17個機動遊戲「使用及操作許可證」,餘下牌照申請正在處理,意味市民今日入場嘅話,可能只有17個機動遊戲玩。機電署發言人補充,有6個遊戲嘅相關申請係開幕前兩日先收到,該署人員處理緊。

計吓數,大會明明話有33個機動遊戲玩,但只有30個遊戲設計獲批,Emily再追問公關,對方無直接回應係邊3個遊戲設計未獲批,淨係話希望12月內可完成申請程序,開放畀公眾玩。