文章日期 : 2016年12月15日

迪士尼Iron Man設施 登特別版鐵甲號「飛天」抗敵

【明報專訊】香港迪士尼樂園嘅「鐵甲奇俠(Iron Man)」設施下年1月11日開幕,迪士尼噚日先請傳媒預覽,Emily留意到唔少遊戲都充滿香港元素。遊客可以喺「飛行之旅」入面,同Iron Man一齊並肩作戰保衛香港,另外仲可以同Iron Man「真人」面對面傾偈同影相𠻹!

1.11開幕 如睇4D電影

Iron Man嚟到香港都係照講英文,但似乎都識聽廣東話,Emily噚日去到「鐵單奇俠裝備展」,見到Iron Man好有型咁登場,仲主動同Emily握手。Iron Man動作多多,不過有時就會講嘢唔到題。

「鐵甲奇俠飛行之旅」係Iron Man遊戲嘅主打,玩家先要經過「史達科技展」參觀吓Tony Stark等多年嚟嘅發明,然後就準備登上「特別版鐵甲號」。玩家要戴3D眼鏡、扣上安全帶,鐵甲號會模擬喺香港上空飛行,由45名乘客同Iron Man一齊對抗外敵,其間鐵甲號嘅座位會傾斜、急煞停等,感覺好似睇緊4D動感電影咁,都幾刺激㗎。機電工程署話已經喺上月下旬向遊戲發出「使用及操作許可證」。

今次Iron Man系列遊戲融入唔少香港元素,例如喺飛行之旅沿途見到青馬大橋、環球貿易廣場(ICC)、香港嘅的士同巴士等。迪士尼話,漫畫Marvel嘅美國團隊早前派員來港睇景,所以畫面先咁逼真。

另外,Iron Man嘅助手、人工智能「卓維」(Jarvis)識講廣東話,仲好熟悉本港交通情况,識得建議人搭港鐵避開塞車嘅繁忙時間。