文章日期 : 2016年12月6日

重現清帝婚宴菜式 廚藝學院赴京學師

【明報專訊】日前我哋報道沙田香港文化博物館搞咗個「宮囍——清帝大婚慶典」專題展覽,原來呢個展覽又關中華廚藝學院事,學院於今年8月派人到北京,研究清帝后嘅合巹宴,仲煮咗其中9道菜式,拍成短片,喺展覽中播放。

合巹宴係清帝大婚儀式一環,有當時流行喺菜餚加上吉祥字樣擺盤技巧,其中燕窩「龍」字拌熏雞絲、燕窩「鳳」字金銀肘花、燕窩「呈」字五香鴨及燕窩「祥」字金銀鴨絲,就屬於呢個系列菜式。另外,子孫餑餑取「早生貴子」嘅吉兆,所以要煮得半生不熟,主要以紅棗、花生、桂圓及栗子為餡心。中華廚藝學院團隊要煮得似模似樣唔容易,佢哋嘅專家親赴北京,到訪熟悉清帝大婚宴食譜嘅凱瑞御仙都中國皇家菜博物館,仲同清朝宮廷史學者苑洪琪面談。

今次展覽會展出多件故宮博物院珍藏嘅大婚文物,展期即日起至明年2月27日。