文章日期 : 2016年11月29日

Google街景推出6年後翻新
攝影師孤身上路影勻全港

【明報專訊】Google早喺2010年推出香港街景服務,6年香港幾番新,好多地方面目全非,Google街景車噚日重新出發,嚟緊會穿梭港九新界嘅大街小巷,仲會首次入埋大嶼山南部,拍攝梅窩、昂坪同貝澳等地靚景,連香港絕大部分嘅行山徑都會包攬埋。但「軍營」喺Google嘅世界仍然係「謎」,因為仲等緊當局批准先影得。

首入嶼南 影埋行山徑

Google街景計劃亞太區經理魏薌君話,Google拍攝會以用家需要為先,眼見6年間咁多建築物唔同咗,又多咗新港鐵站,街景車會以港島西為起點,先影堅尼地城、西營盤等地區,再掃晒港島,再去九龍新界。魏薌君話,拍攝要視乎天氣同日照長短,加上香港路窄車多,如果有嘢擋住鏡頭就要再拍過,難度相對高好多,估計第一項更新至少要兩個月左右時間。

Google實力雄厚,但唔講唔知,拍攝全港街景呢個重任,同台灣一樣,都係得一個人做,呢名孤獨嘅攝影師就係喺Google工作4年幾嘅街景作業員何文豐。佢嚟緊會用街景車、街景三輪車、手推車同重18公斤嘅背包做嘢。何文豐原來已經慣咗攀山涉水,今年3月先去過狗牙嶺,佢話嗰度原來無梯級,要手腳並用爬上去,但由於都係熱門行山徑,佢都覺得值得拍攝。佢又同Emily講,街景圖連蒲台島都覆蓋埋,但東平洲同喜靈洲等就仲未有計劃影住。

Google發言人話,影番嚟嘅街景會有系統將車牌及人樣「打格」,唔擔心有私隱問題,亦有機制畀市民反映。