文章日期 : 2016年11月21日

當年分隔兩地9年 一年見7日 金婚「新人」再行禮

【明報專訊】無國界義工噚日為19對銀髮「新人」舉辦第13屆「跨世紀長者婚禮」,每對「新人」閒閒哋都結咗婚幾十年。大會安排咗電車,載住幾百年嘅愛情穿梭港島,義工又向途人大嗌「佢哋結婚喇」,場面熱鬧,幸福滿溢。

 

19對銀髮長者曬幸福

踏入50年金婚之年嘅林先生夫婦,林先生後生時到廣州工作識咗現在嘅另一半,一見鍾情,仲喺內地爆發文化大革命之年結婚。佢哋生咗4個仔女,一家六口喺廣州生活多年後,林先生為咗生計回流返香港搵食,自此夫妻分隔兩地9年。

當時,林先生只可以趁年尾嘅7日假期去廣州一家團聚,每次分離時,林太都帶住細路到火車站「淚別」丈夫,林先生話,𠵱家諗番太太追火車嘅情景都會「眼濕濕」。

直至1989年,林太同細女來港定居,一家六口喺2000年才真正團聚。但地域上嘅距離並冇磨滅雙方嘅感情,林太話佢哋從來冇出現感情裂痕,林先生仲好感激太太對家庭嘅付出𠻹!

京港越相遇 書信定情

結婚60載嘅黎先生夫婦分別係老撾同越南華僑,喺緣分牽引下,兩人求學時期都曾經喺越南、香港及北京相遇,黎先生使出「情牽一信」一招保持聯絡,最終抱得美人歸。黎太就話,夫妻相處之道在於包容,希望年輕人借鏡。