文章日期 : 2016年11月14日

78日創舉 多謝團隊助避風雨 「香港起飛」圓夢遊世界凱旋

【明報專訊】首架喺香港本土裝嵌嘅小型飛機「香港起飛(Inspiration)」噚日完成3個月環球飛行之旅,朝早10點幾飛抵香港機場。機師鄭楚衡(Hank)話,今次旅程有賴團隊支援,等佢避過雷雨,亦要多謝屋企人陪佢「撐到底」,太太之前仲現身法國探望佢,令佢非常驚喜。

機師感激太太赴法探望

Hank約8年前花150萬元買入組裝配件,聯同500多名本地中學生、工程師、機師裝嵌成「香港起飛」,今年8月28日同飛機工程師達仁喺香港出發,途經澳洲、美國、意大利等近25個國家,全程約5萬公里。

歸功團隊努力 「我只係司機」

呢架港產飛機成功衝出香港,出發後一直向東飛,飛足78日終於凱旋,唔少親友到機場接機,為佢哋歡呼,而阿Hank就感受到「地球原來真係圓㗎」。

花咗約8年實現夢想,Hank開心之餘,都覺得有啲失落,「好似做到呢度……突然停咗」。佢噚日落機之後,話要多謝屋企人支持,一手抱住兩個仔女,太太亦陪伴左右。

Hank仲話,旅程成功全靠團隊付出,以及同事提供資料,等佢哋可以避過雷雨同埋壞天氣,「呢個絕對係團隊嘅effort(努力),大家一齊去做,根本就唔係我一個……我只係一個司機」。