文章日期 : 2016年11月9日

桶改會倡加回收桶減垃圾桶

【明報專訊】食環署早排推出「細口仔」垃圾桶,希望改變市民扔垃圾習慣,但推出之後亂拋垃圾情况仍然普遍。俗稱「桶改會」嘅「公共空間回收及垃圾收集設施改造督導委員會」噚日開會,顧問公司除咗建議增加回收桶、減少垃圾桶嘅大方向,亦提出垃圾桶嘅大小、類別及配置應採用靈活設計。

綠惜地球環境倡議總監朱漢強話,佢有參加顧問嘅問卷調查同聚焦小組,發現旅遊區嘅垃圾桶同回收桶數目嚴重失衡,以其中一個康文署管理嘅設施為例,場地有40個垃圾桶,但只有兩套回收桶,當中好多垃圾桶裏面塞滿膠樽,反映回收桶數量不足。

朱漢強又話,顧問又提出桶嘅大細同配置唔應該一刀切係正確方向,佢話早排食環署推出細口仔垃圾桶反應麻麻,原因係宣傳不足,有啲人係點都唔會因為垃圾桶入口縮小而改變習慣,結果都係將垃圾扔喺垃圾桶旁。佢又話,政府應該因應情况調節唔同地區嘅垃圾桶同回收桶嘅比例同位置,市民嘅公眾意識如有提升,話唔定可以再縮細投入口,甚至進一步減少垃圾桶數量。