文章日期 : 2016年10月31日

讀障助學障 重拾校園樂

【明報專訊】對好多人嚟講,校園生活係快樂回憶,但對於有學習障礙嘅同學仔並非必然。Emily噚日出席展能學童獎學金頒獎禮,呢個獎係表揚學障同學喺學業、品行同社會服務嘅表現。

其中中四學生鍾文軒,自細有過度活躍症同讀寫障礙,溫書時間比人多三四倍,細個亦會百厭啲。佢噚日得到「關懷融合學生獎」,校長大讚佢喺校內好乖,會主動幫其他有學習障礙嘅同學仔融入校園生活。文軒話小學時好想同人玩,但自己又唔識表達,童年變得孤獨,升中後各方面都進步,甚至入排球隊一齊出去比賽攞獎,社交圈子大咗好多。𠵱家文軒見到有同類背景嘅同學被排斥,會主動帶佢哋融入,「我童年時冇咗呢啲回憶,唔想其他人嘅中學生涯都無」。

今屆有180個學生獲提名,頒發30個不同獎項,評審之一嘅教育局督學何志權同心光盲人院副院長黃君保不約而同話,今屆獲提名嘅學生,傑出表現唔只局限於課室,而係走出社會,好似有輕度智障嘅梁偉開,已連續幾屆擔任香港特殊奧運會嘅「金牌司儀」,今屆就獲得傑出展能學童獎。