文章日期 : 2016年10月27日

城大紅隧口賣獸醫課程廣告

【明報專訊】香港城市大學早前宣布,2017學年開辦6年制自資獸醫學學士課程,現時已開始招生,為咗吸引更多人留意同入讀,城大最近就喺每日人流好多嘅紅隧口賣大型廣告(上圖)。

呢個大型廣告中有唔少可愛動物,較吸睛嘅係熊貓同馬仔。聽聞呢個廣告位長期爆滿,有時有錢都未必有位。城大中人同Emily講,城大上月開記者會宣布開辦獸醫學課程後,除咗電視及報章廣告、facebook同YouTube等宣傳途徑外,不斷諗唔同方法令更多人知道呢個首個「港產」獸醫課程。城大今次搵到紅隧九龍入口附近、紅館對出嘅大型廣告板咁啱有檔期,於是拍板製作呢個大廣告,跳出以往大學傳統宣傳手法,走入社區宣傳課程。