地政總署測繪處製圖師張偉明話，1980年代嘅香港地圖仍以人手繪製，當時該署會派員遠赴海外，學習以鉛筆素描地貌。圖為1980年代港島山形地貌圖。（發展局網頁）
政府現時會利用車載同背包式移動測量系統（圖）等新科技繪製地圖，更加精準。（發展局網頁）
發展局長黃偉綸噚日發表嘅網誌，由地政總署測繪處回顧過去幾十年嚟地圖繪製技術進化。過去製作地圖要實地測量同計算，之後用人手逐筆繪畫，而為求準確，更會派員到海外，學習用鉛筆素描地貌，製作一張地圖往往需時超過一年。
地政總署測繪處製圖師張偉明話，從前測量同製作地圖要用大量人手同時間，例如1960年代測量土地嘅經緯儀，只能靠量度角度同運用三角幾何計算長度，之後人手一筆一筆畫出嚟。
派員海外學用鉛筆素描地貌
不過科技迅速發展，近年部門利用各種新技術測量土地，例如激光掃描、車載同背包式移動測量系統、無人機拍攝等收集數據，再用地理資訊系統同製圖軟件將數據轉化為地圖，除咗省卻大量人手同時間，亦提高精準度。
地政總署繪製嘅地圖，亦見證香港半世紀以嚟高速發展，張偉明以兩張1970年代沙田地圖為例，1974年嘅地圖顯示沙田仲未填海，但3年後更新嘅地圖已有馬場，嗰時沙田第一城都未填海興建，地圖更新可以清楚展示香港地貌轉變同社會發展。
