文章日期 : 2020年4月3日

【Emily】海洋公園休業 企鵝日日進補

【明報專訊】新型冠狀病毒出現動物受感染個案,海洋公園喺1月下旬起暫停開放,原來呢段休園時間,員工都無鬆懈。海園公園喺facebook公布短片,介紹佢哋做全面清潔同提升動物護理程序,例如因鳥類嘅呼吸道易受感染,企鵝護理員每日餵飼時,會將維他命或營養補充品混入飼料中,仲會特別留意佢哋嘅呼吸同心跳。

海洋公園至今休園兩個幾月,園內護理團隊努力確保動物健康,例如為水豚做日常護理工作,觀察其身體狀况同定期抽血檢測;每日為海豹量度體溫,幫佢哋刷牙同檢查口腔,保持口腔衛生。園方話,無論係遊樂設施、動物展館及幕後設施都會徹底清潔,會繼續採取嚴格嘅抗疫措施,期待重開後為訪客締造好玩無憂又安全嘅體驗。