文章日期 : 2020年3月25日

【Emily】機構推草藥防疫香包 話可鎮定放鬆神經

【明報專訊】疫情下,市民用唔同方法增強免疫力,香港中醫藥服務中心推出「草藥防疫香包」,內有蒼朮、白芷、檀香、甘松、艾葉、冰片等,仲加入薰衣草。話有鎮定同放鬆神經功效。中心2月份售出約1.5萬個,部分以成本價賣畀非牟利機構,幫助長者。

中心總經理朱立城(Eugene)話,某次同曾經歷SARS嘅熟客傾開,知道SARS時都有香包抗疫。Eugene話香包香氣有安神效果,有助紓緩市民精神壓力。

不過唔係人人都接受同一種香氣,香港專業教育學院(IVE)柴灣院校應用科學系高級講師關德祺用當歸做例,有人聞完精神抖擻,有人就接受唔到。佢又提醒市民,選購中藥或中成藥增強免疫力要先分清自己體質,好似板藍根咁,「寒底」人服用,未必對身體好。如果唔清楚自己體質,要先向中醫查詢。