文章日期 : 2020年3月18日

【Emily】理大示範網上教設計繪圖

【明報專訊】疫情下,八大資助院校都實施網上教學,唔少人關注藝術設計同醫療學科可以點樣做。理工大學噚日就示範佢哋嘅網上教學,設計學院導師喺直播示範繪圖,學生就各自跟佢畫,再上載雲端系統;眼科視光學系就拍咗超過70條片,示範儀器用途。

醫療課最快周一恢復技能訓練

理大已行網上教學5個星期,噚日即場示範咗一堂設計學院嘅課堂,由設計學院專任導師晉裕昌即時做平面繪圖教學。晉裕昌話,以往會叫所有學生圍埋一齊睇佢畫圖,𠵱家就透過直播系統示範,學生上傳作品之後,佢會喺畫面展示學生嘅作品,即時回饋。有人擔心網上課堂會影響學生出席率,理大醫療及社會科學院院長岑浩強話,學生至今參與率維持喺八九成,有唔少學生仲比以前踴躍發問。

岑浩強又話,理大有多個醫療相關課程,例如職業治療、護理學、視光學等,需要臨牀實習同技能訓練,為免影響教學進度,最快下周一會恢復個別學科嘅技能訓練,但一切仍有待校方批核。