文章日期 : 2020年3月13日

【Emily】近1500斑蝶來港越冬

【明報專訊】每年都有大批斑蝶嚟香港越冬,綠色力量公布最新調查結果,總結過去冬天(2019年10月至2020年2月)4個地點嘅越冬斑蝶數目,包括屯門小冷水錄得649隻,港島深水灣521隻,大嶼山分流同水口分別錄得200隻同68隻,合共1438隻,係自2009年有紀錄以嚟第3高,僅次於2012年5536隻同2015年1965隻。

其實近年嚟香港越冬嘅斑蝶數目反覆,以小冷水為例,每隔2至3年會出現一次高峰,剛過去嘅冬季雖然錄得649隻,同對上一個高峰期,即係2015年冬天嘅1596隻仍有距離。至於深水灣嘅越冬蝴蝶數量按年同期大升約22倍,亦係2009年有紀錄以嚟第2高,僅次於2017年錄得嘅1122隻。

遷徙路線之謎未解

綠色力量高級環境事務經理單家驊分析4個地點嘅斑蝶品種同習性,估計嚟自不同地區。佢話大嶼山分流同水口嘅斑蝶以虎斑蝶為主,小冷水同深水灣則大部分係藍點紫斑蝶同幻紫斑蝶;另外,斑蝶喺分流同水口出沒嘅時間係去年10月至12月,小冷水同深水灣就由10月至1月。不過,即使研究多年,單家驊話至今仍未能掌握斑蝶遷徙路線,要解開呢個謎,仍需繼續努力。