文章日期 : 2019年3月27日

水署首名女學徒 勤健身練力

【明報專訊】街邊爆水管要等人處理,可能會遇到水務署招聘嘅首名女學徒。

大喉鉗駁喉要多花時間

香港專業教育學院(IVE)土木工程高級文憑學生高福儀,中七畢業後曾修讀商科嘅副學士課程,後來覺得水務行業發展潛力大,2016年投身「整水喉」,任職水務署見習二級技術員(水務),成為署方聘請嘅首名女學徒。福儀話女仔體力較弱,例如用大型喉鉗接駁水喉時要花多啲時間。為咗應付工作嘅體力要求,佢每周健身,舊年完成學徒計劃,現獲水務署聘任為技工(土木)。

IVE飛機維修工程高級文憑畢業生黃文軒,現時喺香港飛機工程有限公司做飛機維修技工學徒。文軒話飛機機身有幾層樓高,飛機維修不乏高空作業,本身畏高嘅佢,除咗日常工作反覆練習,得閒仲會去主題公園玩機動遊戲,克服心理障礙。

職業訓練局「傑出學徒獎勵計劃」嘉許努力學習同表現優秀學徒,今年共有12名傑出學徒獲獎,包括以上兩人。