文章日期 : 2019年3月22日

芬蘭蟬聯最幸福地區 香港排76

【明報專訊】大家可能無為意3月20日係「國際幸福日」,聯合國當日就公布咗最新一份《全球幸福報告》(World Happiness Report),香港同上年份報告一樣排第76位,繼續被排名第25位嘅台灣、第34位嘅新加坡、第52位嘅泰國、第54位嘅韓國同第58位嘅日本拋離。

報告綜合2016年至2018年期間,156個國家或地區嘅社福支援、自由度、貪腐程度、預期壽命等,去評定佢哋市民有幾幸福,芬蘭蟬聯最幸福國家,之後依次係丹麥、挪威、冰島同荷蘭。

中國大陸下跌7位排第93位,美國就守住第19位,面對脫歐問題嘅英國嘅排名反而由第19位升到第15位。排包尾係南蘇丹,聯合國早前話過當地內戰令40萬人死,六成人唔夠嘢食,而中非共和國、阿富汗、坦桑尼亞亦齊齊墊底。有份寫今份報告嘅John Helliwell話,社區點樣互動,包括喺學校、公司、鄰舍之間、社交媒體之上,都好明顯影響到全球幸福。