文章日期 : 2019年3月11日

臥龍招學生實習 有得餵熊貓

【明報專訊】國寶大熊貓「萌爆」,唔少人想親近,機會嚟嘞!民政事務局噚日公布「四川臥龍國家級自然保護區青年實習計劃」,18至29歲全日制學生可以報名,名額18個,獲選者會喺暑假去四川實習6星期,除咗有得餵熊貓食零食,仲可以做戶外研究員、導賞員同埋教育大使。

馬輝同梁詠婷舊年參加計劃,馬輝話喺當地隔住玻璃睇到大熊貓「已經好興奮」,佢獲派做戶外研究員,其中一個職責係要做戶外考察,記錄動物行蹤,團隊要喺荒山野嶺過夜幾日,馬輝話估唔到內地除咗經濟發展,山區依然保持生物多樣性,令佢大開眼界,將來有意返內地做保育。

詠婷就負責做博物館導賞,幫手寫講稿同帶團宣揚保育。佢話過程中反思人類發展對自然影響,「人類事後亡羊補牢,要承受好大後果」。

暑假出發 名額18個

講番個計劃,即日起接受報名,有興趣可以瀏覽海洋公園網站,實習期為7月21日至8月31日,費用全免,實習計劃期間,參加者會被安排去臥龍幾個唔同組織機構工作,分別位於汶川縣耿達鄉、臥龍鎮、鄧生溝等地。