文章日期 : 2019年3月4日

前粉嶺裁判法院 活化做青年領袖學院

【明報專訊】有超過50年歷史嘅「前粉嶺裁判法院」去年底完成復修,仲活化做青年協會領袖學院,月底開幕。發展局長黃偉綸噚日發表網誌,帶大家一睹法院新面貌。

數碼會議廳做演說訓練

黃偉綸話,昔日嘅「一號法庭」已活化為數碼會議廳,畀年輕人討論政策,同做演說訓練;「二號法庭」就保留原貌,包括裁判官席、犯人欄、公眾席及記者席,第時可以用嚟做模擬法庭訓練。導賞路線仲結合咗混合實境(Mixed Reality)及擴增實境(Augmented Reality),大家可以化身偵探,重返當年法院現場蒐證,都幾有趣。

「前粉嶺裁判法院」係發展局活化歷史建築伙伴計劃第三期項目,法院喺1961年啟用,係第一間喺新界興建嘅裁判法院,主要處理新界北案件。

自從新粉嶺法院大樓喺2002年落成,舊法院就關閉,之後多次被租用拍電影,包括2003年拍攝嘅《無間道II》。法院大樓樓高兩層,正面外牆有雙層簷篷同埋類似「古典神廟」建築嘅仿石柱;大樓中庭大堂由「中央天井」及「長形窗戶」引入天然光,好有特色。