文章日期 : 2019年2月27日

Deanie姐開金口 面斥搭車擾人

【明報專訊】唔少市民坐巴士或地鐵都遇過缺德乘客,有啲行為令人咋舌。運輸署最近聯同港鐵同專營巴士公司,並邀請影后葉德嫻(Deanie姐)拍攝3分鐘宣傳片,短片入面Deanie姐挺身而出,嘲諷各式各樣無禮乘客,推廣「搭車顧自己,都要顧人哋」信息,影片噚日喺社交媒體洗版。Emily問過運輸署,原來揀Deanie姐係因為佢經常搭公共交通,形象「貼地」又「俠女」,今次佢無收酬勞,部分場景更係親身經歷。

話值得拍唔收錢 有親身經歷

今次宣傳片分30秒同埋3分鐘兩個版本。喺3分鐘短片入面,Deanie姐先後遇上12類缺德無禮乘客,例如喺地鐵有人衝門差啲撞到孕婦、有人喺車廂食嘢、有人唔戴耳筒播歌睇片等。

至於喺巴士上,Deanie姐就遇到有乘客「飛象過河」、腳踩對面座位,又有婦人掛住睇手機唔記得落車仲鬧車長等等,全部都畀Deanie姐面斥不雅,霸氣之餘,佢仲提醒乘客應有之舉,呼籲大家「搭車顧自己,都要顧人哋」。

網民話要整埋普通話版

短片一出,唔少網民都大讚運輸署夠「貼地」,好有共鳴,仲建議Deanie姐再拍第二輯短片,涵蓋其他缺德行為。有網民仲話應該要整埋普通話版本。

Emily問番運輸署,原來係署方聯絡Deanie姐經理人,Deanie姐一口應承,仲引述Deanie姐話好值得拍,兼畀咗好多意見,包括設計火爆嘅對白同場景。

運署:Deanie姐常搭公共交通

形象貼地又俠女

至於點解搵Deanie姐?朋友話運輸署希望搵有分量又「貼地」嘅藝人,由於Deanie姐經常坐公共交通,加上佢俠女嘅形象,好適合斥責缺德行為,相信由佢講會得到共鳴。

運輸署朋友透露,片中有兩幕鬧車長嘅場景係特別加入,以落實專營巴士服務獨立檢討委員會建議,教育市民唔可以辱罵車長。朋友又話,今次短片確同以往政府宣傳片正面宣傳唔同,特地以一啲反面行為切入,並透過「當頭棒喝」形式,直斥其非,仲話運輸署長畀咗好大空間佢哋創作,對短片反應咁好喜出望外。

一改硬銷 署長畀創作空間

Emily覺得今次都算係消防處「任何仁」後,政府網上軟銷教育另一力作。

www.youtube.com/watch?v=kNrIpj8bYyQ